Du Bestemmer er eit samarbeid mellom Teknologirådet, Datatilsynet og Senter for IKT i utdanninga. Målet er å auke ungdom sin kunnskap om personvern og å gjere dei meir bevisste rundt vala dei gjer når dei brukar digitale hjelpemiddel slik som internett og mobiltelefon.
Det er utarbeidd ein undervisningspakke for ungdomstrinnet/vidaregåande (13-17 år) og ein for dei eldste barna på barneskulen (9-13 år). Ein undervisningspakke består av eit hefte med faktaopplysningar, historier frå røyndommen, og diskusjonsoppgåver. Det er også laga ein rekke filmar som skal hjelpe til med å stimulere debatt og skape engasjement rundt kvart tema. Ein DVD med desse filmane følgjer også med undervisningspakken.
Det er lagt stor vekt på å ikkje heve ein moraliserande pekefinger. Målet med undervisningsopplegget er å skape refleksjon og diskusjon. Opplegget stiller opne spørsmål slik at den enkelte sjølv kan sette grenser. Har ein kunnskap om konsekvensar av mulige val, kan ein også ta ansvar.
